John 19

1Buna Pilatu wubonga Yesu ayi wunzubisa bikoti. 2Masodi matunga budu ki zitsende ; matula kiawu va ntu Yesu ayi mamvuika yunga kimbuaki. 3Mayiza ku kaba ayi mankamba :

—Mbotiꞌaku ntinu wu Bayuda !

Banzuba zimbata. 4Pilatu wubuela totuka diaka ku nganda, wuba kamba :

—Tala ! Ndieka ku lunatina niandi ku nganda muingi luzaba mboti ti ndikadi mona kadi bila kimosi mu niandi.

5Yesu wutotuka ku nganda, wuvuata budu ki zitsende ayi yungakimbuaki. Pilatu wuba kamba :

—Tala, mutu beni !

6Bapfumu zi zinganga Nzambi ayi minsungi mi Nzo Nzambi bu bammona, bayamikina mu kingolo :

—Mbandi va dikulusi ! Mbanda va dikulusi ! Vayi Pilatu wuba kamba :

—Lumbonganu beno veka ayi lumbanda va dikulusi bila minu ndikadi mona kadi bila kimosi mu niandi.

7Bayuda bavutudila Pilatu :

—Beto Mina midi yeto ayi landakana mu matedi mina mieto niandi kafueti kaka fua bila wukibiekidi Muana Nzambi.

8Pilatu bu kawa mambu momo, wuluta mona boma. 9Wubuela kota ku buangu kioki bansambisilanga batu.

—Kuevi wuba e ?

Vayi yesu kasia vutula kadi diambu dimosi ko.

10Pilatu wunkamba :

—Ngeyo mengi kundiolukisa e ? Kuisi zaba ko ti minu mbeki minsua mu kuyekula voti ku bandisa va dikulusi e ?

11Yesu wumvutudila :

—Kulendi baka lulendo ko mu minu enati Nzambi widi ku Yilu kasi kuvana luawu ko. Diawu mutu wowo wutsumbisidi kuidi ngeyo vodidi masumu ma ngolo.

12Tona mu thangu yina, Pilatu wutomba nzila yikafueti kunyekudila vayi Bayuda baluta yamikina :

—Enati yekudi mutu wawu, buna wisi nkundi wu Sezali ko bila woso mutu wukibiekidi ntinu buna mbeni yi Sezali.

13Bu kawa mambu momo, Pilatu wubuela nata Yesu ku nganda ; wuyenda vuanda ku tilibinadu, va buangu baba tedilanga “Nganda matadi makitoko.” Mu ki Ebelewo “Ngabata”. 14Mambu momo mavangama mu lumbu kituamina nyengo wu Pasika, nduka-nduka va thangu midi.

Buna Pilatu wukamba bayuda :

—Tala ntinuꞌeno niandi niawu !

15Vayi bayamikina :

—Kafua ! Kafua ! Mbandi va dikulusi !

Pilatu wuba yuvula :

—Buevi, ndibandisa ntinuꞌeno va dikulusi e ?

Bapfumu zi zinganga Nzambi zimvutudila :

—Beto tuisi ntinu wunkaka ko, ntinuꞌeto Sezali kaka !

16Pilatu wuba yekudila Yesu muingi bambanda va dikulusi.

Lufua lu Yesu

(Matayi 27.32-56 ; Malako 15.21-41 ; Luka 23.26-49)

Buna babonga yesu ayi bannata. 17Wutotuka ayi wunata dikulusi diandi, wuyenda ku buangu kibabantedilanga : “Mvesi wu ntu” bu dinsundula mu ki Ebelewo : “Ngolongota”. 18Kuna bambandila va dikulusi va kimosi ayi batu buadi bankaka : wumosi ku lumoso, wumosi ku lubakala ; Yesu va khatitsika.

19Pilatu wuvanga tini ki dibaya, wutula kiawu vana dikulusi ; munamusonama : “Yesu muisi Nazaleti, ntinu wu Bayuda.” 20Bayuda bawombo batanga tini ki dibaya beni bila buangu kioki babandila Yesu va dikulusi kiba kifikama ayi divula. Tini ki dibayabeni kisonimina mu Kiebelewo, mu Kingeleki, mu Kilatini.

21Buna bapfumu zi zinganga Nzambi zi Bayuda zikamba Pilatu :

—Kadi sonika ti “Ntinu wu Bayuda” vayi sonika ti “Mutu wawu wutuba ti : minu ndidi ntinu wu Bayuda”.

22Vayi Pilatu wuvutula :

—Mambu momo tsonikini, mafueni !

23Masodi bu mamana banda Yesu va dikulusi, mabonga minledi miandi, bavasa miawu mu bikuku biya ; kadika disodi ayi kuku kiandi. Babonga diaka yunga kiandi ; muaki yunga beni kiba ki nledi wumosi kaka tona ku yilu nate ku wanda, kikambu tungu.

24Diawu masodi makambasana mawu na mawu :

—Tubikeno kukikanzuna vayi tukitela wadi ▼

▼tukitela wadi : voti tukitela tsombo.

muingi tutala nani wumbuilu wadi beni. Mambu momo mavangama mu diambu di dedikisa masonuku mantuba ti :

Bakabasana minledi miama ayi batela yunga kiama wadi.
Masodi mavanga mambu momo.

25Ngudi yi Yesu, nkomba ngudi yi Yesu, Maliya : nketo wu Klopasi ayi Maliya muisi Mangadala batelama va ndambu vaba dikulusi di Yesu. 26Yesu bu kamona ngudi andi ayi nlonguki wowo kaluta zola wutelama vana ; buna wukamba ngudi andi :

—Nketo, tala muanꞌaku !

27Bosi wukamba nlonguki :

—Tala ngudi aku !

Tona mu ntangu beni nlonguki wowo wulunda ngudi yi Yesu ku nzoꞌandi.

28Yesu bu kazaba ti mambu moso madukidi, wutuba mu diambu masonoko madedakana :

—Ndieka mona phuila.

29Mvungu wumosi wuba vana, wuba wuwala vinu ki ngami. Babuika eponzi mu vinu beni ; basomika eponzi beni va tsongi nti wu isopi ; bavumuna nti beni nate va mutu wu Yesu muingi kanua.

30Yesu bu kabimba vinu beni ki ngami, wutuba :

—Mamoso madukidi. Buna wudokika ntuꞌandi, wutabuka vumunu.

31Sumbu kiba lumbu ki khubumunu, bila lumbu kina kiba lumbu kinneni ki saba, diawu Bayuda balombila Pilatu ti babakelula malu ayi baba botula va dikulusi mu diambu di zinitu ziawu zibika vuanda va dikulusi mu lumbu ki saba. 32Masodi mayiza ayi makelula malu ma mutu wutheti ayi ma mutu wowo wunkaka wu babanda yandi va dikulusi. 33Bu batula vaba Yesu, bamona ti Yesu wukifuididingai, basia kelula malu mandi ko. 34Vayi disodi dintobula dionga mu luvati ; vana vawu menga ayi nlangu bitotukidi. 35Mutu wowo wummona wutelama kimbangi ayi kimbangi kiandi kidi kikiedika ayi niandi zebi ti weti tuba kiedika muingi beno mamveno luwilukila. 36Bila mambu momo mavangama mu diambu di masonoko masunduka : kadi mvesi andi wumosi wusia kelulu ko. 37Buela diaka, masonuku mankaka meti kamba : thaluꞌawu yela ba kuidi mutu wowo batobula.

Bazika Yesu

(Matayi 27.57-61 ; Malako 15.42-47 ; Luka 23.50-56)

38Momo bu mavioka, Zefu muisi Alimate, wuba nlonguki wu Yesu mu kinsueki bila wuba ntinanga Bayuda, wuyenda lomba minsua kuidi Pilatu muingi kabotula nitu yi Yesu va dikulusi. Pilatu wumvana minsua. Wuyenda bonga nitu Yesu. 39Nikodemi, mutu wowo va thonono wuyenda bata Yesu mu builu, mamvandi wuyiza, wunata bungu kimalasi matsudi ma mile masobakana ayialowesi. Malasi beni maba nduka-nduka makumatatu makilo. 40Babonga nitu yi Yesu, bazinga yawu malasola ma lino momo badukudila malasi boso buididi kifu ki Bayuda mu zika mvumbi. 41Va buangu kioki babandila Yesu va dikulusi vaba ndima yi minti. Muna ndima beni muba ziami kimona disokolo mu ditadi, muzikulu mutu ko. 42Batula muawu Yesu bila ziami beni kiba kifikama mu diambu di khubumunu yi Bayuda.